اسلام آباد: وزیراعظم نے پہلے مرحلے میں کابینہ کا حجم چھوٹا رکھنے کا فیصلہ کرلیا، کابینہ کل شام 4 بجے حلف اٹھائے گی۔ ذرائع کے مطابق ابتدائی طور پر وفاقی کابینہ میں 12 سے 14 وزراء کو شامل کیا گیا تھا۔ پہلے مرحلے میں وزارت خزانہ، وزارت خارجہ، وزارت توانائی، وزارت منصوبہ بندی اور وزارت داخلہ کے قلمدان سونپے جائیں گے۔ جبکہ وزارت اطلاعات، وزارت نجکاری اور دیگر اہم وزارتوں کے وزراء کا بھی تقرر کیا جائے گا۔ وفاقی وزراء کو اضافی وزارتیں بھی دی جائیں گی۔ وفاقی کابینہ میں اسحاق ڈار، عطاء اللہ تارڑ، خواجہ آصف اور احسن اقبال کو شامل کیا جائے گا۔ جبکہ محمد اورنگزیب اور شمشاد اختر کو بھی وفاقی کابینہ میں شامل کیے جانے کا امکان ہے۔ نئی وفاقی کابینہ نومنتخب صدر آصف علی زرداری سے حلف لے گی۔
