اسلام آباد: نگراں وزیراعظم انوار الحق کاکڑنے کہا ہے کہ پاکستان میں پولیو کی روک تھام کے لیے عالمی برادری اور ترقیاتی اداروں کے کردار کو سراہتے ہیں۔
اسلام آباد میں نگراں وزیراعظم سے صدر روٹری انٹرنیشنل سٹیفنی آرچک کی قیادت میں وفد نے ملاقات کی، وفد میں تھامس انتھونی گمپ، محمد فیض قدوائی، عبدالعزیز میمن اور مسرور شیخ بھی شامل تھے۔
ملاقات میں وفد نے نگراں وزیراعظم انوارالحق کاکڑ کو پاکستان سمارٹ ولیج پروگرام اور پولیو سے بچا کے حوالے سے روٹری انٹرنیشنل کی کارکردگی پر تفصیلی بریفنگ دی۔
انوار الحق کاکڑ نے روٹری انٹرنیشنل کی پہلی خاتون صدر سٹیفنی کو عہدہ سنبھالنے پر مبارکباد دی اور روٹری انٹرنیشنل کی پاکستان میں انسداد پولیو، تعلیم اور دیگر شعبوں میں خدمات کو سراہا۔
انوار الحق کاکڑ نے کہا کہ وہ پاکستان میں پولیو کی روک تھام کے لیے عالمی برادری اور ترقیاتی اداروں کے کردار کو سراہتے ہیں۔ ہم پرعزم ہیں کہ ملک کے ہر بچے کو پولیو سے محفوظ رکھا جائے’ حکومت روٹری انٹرنیشنل کے پروگرامز میں ہر ممکن تعاون فراہم کرے گی’ امید کرتے ہیں کہ آپ کی تنظیم پروگراموں کی رسائی کو مزید وسعت دے گی۔
