راولپنڈی :پاکستانی امن دستوں کے2 مقامی مریضوں کو ہسپتال منتقل کرنے والے قافلے پر سوڈان اور جنوبی سوڈان کے درمیان متنازعہ علاقہ میں گھات لگا کر حملہ کیا گیا۔پاکستانی امن دستوں نے موثر جواب دیا اور عسکریت پسندوں کو پسپائی پر مجبور کر دیا۔ فائرنگ کے تبادلے میں سپاہی محمد طارق (ساکن بدین، سندھ) شہید جبکہ دو اہلکاروں سمیت چار افراد زخمی ہوگئے۔ آئی ایس پی آر کے مطابق پاکستانی امن دستوں کے قافلے پر حملہ 28 جنوری 2024 کو ہوا۔ بیان میں کہا گیا کہ پاکستان کے امن دستے نے ہمیشہ اپنی پیشہ ورانہ مہارت اور فرض سے لگن کی وجہ سے خود کو ممتاز کیا ہے۔آج تک 181 پاکستانی امن دستوں نے دنیا بھر میں امن کے لیے اپنی جانوں کا نذرانہ پیش کیا۔آئی ایس پی آر کا کہنا ہے کہ پاکستان عالمی برادری کے ایک ذمہ دار رکن کے طور پر اپنے کردار کے لیے پرعزم ہے اور اقوام متحدہ کی سرپرستی میں عالمی امن اور استحکام کے لیے اپنا کردار ادا کرتا رہے گا۔
