اسلام آباد : وزیر داخلہ محسن نقوی کا کہنا ہے کہ شہید میجر رضوان طاہر قوم کے ہیرو ہیں، ان کی عظیم قربانی رائیگاں نہیں جائے گی۔ چند روز قبل میجر رضوان طاہر بلوچستان کے علاقے مستونگ میں بھارتی اسپانسرڈ دہشتگردوں کے آئی ای ڈی دھماکے میں شہید ہو گئے تھے۔وزیر داخلہ محسن نقوی نے شہید میجر رضوان طاہر کی رہائش گاہ جاکر ان کے والد کرنل (ر) محمد طاہر اور اہلخانہ سے ملاقات کی، اس موقع پر چیف کمشنراسلام آباد محمد علی رندھاوا، آئی جی اسلام آباد علی ناصر رضوی بھی وزیر داخلہ کے ہمراہ تھے۔وزیرداخلہ نے شہید میجر رضوان طاہر کے والدین اور بھائی میجر عثمان طاہر سے تعزیت کی اور شہید کے درجات کی بلندی کیلئے فاتحہ خوانی بھی کی۔دوران ملاقات وزیرداخلہ محسن نقوی نے شہید میجر رضوان طاہر کے والد سے کہا کہ آپ شہید بیٹے کے باہمت اور بلند حوصلہ والد ہیں، آپ کا یہ حوصلہ اور عزم ہی قوم کی طاقت ہے، آپ کی عظمت کو سلام ہے۔محسن نقوی کا کہنا تھا میجر رضوان شہید نے بہادری سے بھارتی اسپانسرڈ دہشتگردوں کا مقابلہ کیا اور جام شہادت نوش کیا ، شہید میجر رضوان طاہر قوم کے ہیر و ہیں، ان کی عظیم قربانی رائیگاں نہیں جائے گی، شہداء کے خاندانوں کی لازوال قربانیوں کی قوم ہمیشہ مقروض رہے گی۔شہید میجر رضوان طاہر کے والد رنل (ر) محمد طاہر نے وزیر داخلہ کو بتایا کہ بیٹے نے کئی خفیہ آپریشنز کو لیڈ کیا اور متعدد دہشتگردوں کو جہنم واصل کیا، مجھے اپنے بیٹے کی شہادت پر فخر ہے۔
