حکومت سازی: آصف زرداری اور بلاول لاہور پہنچ گئے، لیگی قیادت سے ملاقات کا امکان

لاہور: سابق صدر آصف علی زرداری اور پاکستان پیپلز پارٹی کے چیئرمین بلاول بھٹو زرداری لاہور پہنچ گئے جہاں ان کی لیگی قیادت سے ملاقات اور آئندہ حکومت کے حوالے سے بات چیت کا امکان ہے۔
تفصیلات کے مطابق سابق صدر آصف علی زرداری لاہور پہنچ گئے ہیں، جہاں وہ لاہور میں نامعلوم مقام پر لیگی قیادت سے اہم ملاقات کریں گے۔
لیگی ذرائع کے مطابق مسلم لیگ ن کے صدر شہباز شریف اور اسحاق ڈار آصف زرداری سے ملاقات کریں گے اور نواز شریف کو خصوصی پیغام دیں گے۔
اس کے علاوہ شہباز شریف نواز شریف کی جانب سے آصف علی زرداری کو وفاق میں مشترکہ حکومت بنانے کی دعوت بھی دیں گے۔ مسلم لیگ ن کے ذرائع کے مطابق نواز شریف نے وفاق اور پنجاب میں حکومت سازی کے لیے تمام تر اقدامات کا مینڈیٹ شہباز شریف کو سونپ دیا۔
بلاول بھٹو زرداری سکھر سے خصوصی نجی طیارے کے ذریعے لاہور پہنچ گئے ہیں، جہاں وہ پیپلز پارٹی کی سینٹرل ایگزیکٹو کمیٹی کے ارکان سے آئندہ حکومت کی تشکیل کے حوالے سے مشاورت کریں گے۔
اس کے علاوہ بلاول بھٹو زرداری سے مسلم لیگ نون کے رہنماں کی ملاقات کا بھی امکان ہے۔ ذرائع کا کہنا ہے کہ حکومت سازی کے حوالے سے لاہور میں سیاسی اجلاس ہوگا۔