اسلام آباد: صدر آصف علی زرداری اور وفاقی وزیر داخلہ محسن نقوی نے تنخواہیں نہ لینے کا فیصلہ کیا ہے۔ ایوان صدر کے پریس ونگ سے جاری بیان کے مطابق صدر نے یہ فیصلہ درپیش معاشی چیلنجز کے پیش نظر کیا۔ صدر آصف زرداری کے فیصلے کا مقصد ملک میں محتاط مالیاتی انتظام کی حوصلہ افزائی کرنا ہے۔ صدر مملکت نے تنخواہ نہ لینے کو ترجیح دی، قومی خزانے پر بوجھ نہ ڈالنے کا فیصلہ کیا۔ دوسری جانب وفاقی وزیر داخلہ محسن نقوی نے کہا کہ الحمدللہ بطور وفاقی وزیر داخلہ قوم کی خدمت کرنا اعزاز کی بات ہے۔ اس مدت کے دوران اپنی تنخواہ نہ لینے کا فیصلہ کیا ہے۔ اس مشکل وقت میں، میں نے ہر ممکن طریقے سے اپنی قوم کی خدمت کرنے کا تہیہ کر رکھا ہے۔
