اسلام آباد: پاور ڈویژن نے الیکٹرک گاڑیوں، موٹرسائیکل اور الیکٹرک رکشہ کے فروغ کے لیے اہم قدم اٹھاتے ہوئے ملک بھر میں بیٹری چارجنگ اسٹیشنز کے قیام کے معیار کا مسودہ تیار کرلیا۔
پاور ڈویژن کی جانب سے جاری اعلامیہ کے مطابق وفاقی وزیر توانائی نے کہا ہے کہ ملک بھر میں بیٹری چارجنگ اسٹیشنز کے قیام کے معیار کا مسودہ تیار کرلیا گیا ہے جبکہ چارجنگ اسٹیشنز کو سستی بجلی فراہم کرنے پر غور ہورہا ہے۔
وفاقی وزیر نے مزید کہا کہ چارجنگ اسٹیشنز کا قیام عالمی معیارات پر عمل میں لایا جائے گا، اور مسودے کو تمام اسٹیک ہولڈرز سے مشاورت کے بعد جلد پاور ڈویژن سے منظور کرایاجائے گا۔
انہوں نے کہا کہ چارجنگ اسٹیشن کے لیے بجلی کے کنکشنز ترجیجی بنیاد پر دیے جائیں گے اور چارجنگ اسٹیشن کے لیے بجلی کی سپلائی اور وولٹیج کو یقینی بنایا جائے گا۔
وفاقی وزیر برائے توانائی کا کہنا تھا کہ چارجنگ بیٹریز کی ٹیسٹنگ کیلیے بھی معیاری ٹیسٹنگ سنٹرز قائم کیے جائیں گے۔
اویس لغاری نے کہا کہ ان اقدامات سے پیٹرول پرچلنے والی گاڑیوں کیاخراجات میں خاطر خواہ کمی ہو گی اور پاکستان میں ایک نئے دور کا آغاز ہوگا۔
