گورنر خیبر پختونخوا فیصل کریم کنڈی نے کہا ہے کہ ماضی میں جو حصہ کے پی کو ملنا تھا وہ نہیں مل سکا، صوبے کو اپنا حق دلاؤں گا جبکہ کبھی نہیں چاہوں گا گورنر ہاس سازش کا حصہ بنے۔
ڈیرہ اسمعیل خان میں اپنی رہائش گاہ میں پریس کانفرنس کرتے ہوئے فیصل کریم کنڈی نے کہا کہ صوبائی حکومت سے کہوں گا کہ پانی کے معاملے پر مل کر کام کریں، ڈی آئی خان میں لوڈ شیڈنگ کا بڑا مسئلہ ہے، پوری کوشش ہے عوام کو تبدیلی نظر آئے، بجلی کی لوڈ شیڈنگ کو کم کرکے صفر پر لائیں گے۔
انہوں نے کہا کہ ہمیشہ یہ بات کی ہے کہ خیبر پختونخوا کا مقدمہ وفاق میں لڑنا چاہتا ہوں، کبھی نہیں چاہوں گا گورنر ہاؤس سازش کا حصہ بنے، اپنے صوبے کا وکیل بن کر وفاق سے زیادہ سے زیادہ فنڈز دلاؤں گا۔
گورنر خیبر پختونخوا نے کہا کہ امن و امان کنٹرول کرنا صوبائی حکومت کا کام ہے، پوری کوشش ہوگی اپنے عہدے سے انصاف کروں، پندرہ سال بعد کسی گورنر خیبرپختونخوا نے قائداعظم کے مزار پرحاضری دی۔
ان کا کہنا تھا کہ حلف لیتے ہی کہا کہ خیبرپختونخوا کا مقدمہ لڑوں گا، ماضی میں جو حصہ کے پی کے کو ملنا تھا وہ نہیں مل سکا، صوبے کے لیے مل کر کام کریں گے، جبکہ ہماری زمینیں آباد ہوں گی تو دوسرے صوبو ں کو بھی گندم دیں گے۔
انہوں نے کہا کہ خیبرپختونخوا پولیس کی سب سے کم تنخواہ ہے، جبکہ دہشت گردوں سے لڑنے کے لیے پولیس کے پاس وسائل نہیں۔فیصل کریم کنڈی نے کہا کہ ڈی آئی خان کی حالت سب کے سامنے ہے، ڈی آئی خان میں جج اغوا ہوا، کسٹم اہلکار قتل ہوئے۔
