واشنگٹن: امریکی خلائی ادارے ناسا اور یورپی خلائی ادارے ای ایس اے کے مشترکہ مشن ہبل اسپیس ٹیلی اسکوپ نے ار ریگیولر اسپائیڈر کہکشاں کی نئی تصویر جاری کر دی۔ار ریگیولر کہکشائیں ایسی کہکشائیں ہوتی ہیں جن کی باقاعدہ کوئی ساخت نہیں ہوتی۔زمین سے اندازا تین کروڑ نوری سال فاصلے پر موجود یو جی سی 5829 کہکشاں لیو مائنر میں موجود ہے۔
ہبل سے متعلقہ ماہرینِ فلکیات کا ایک بیان میں کہنا تھا کہ اس دھندلی کہکشاں کے زیادہ مشاہدات نہ ہونے کے باوجود اس کی خصوصیات واضح ہیں جن کی وجہ سے اس کو اسپیائیڈر کہکشاں کہا جاتا ہے۔
ماہرین کے مطابق چمک دار ستارہ ساز سروں کے ساتھ کہکشاں کے مسخ شدہ بازو مکڑی کی ٹانگوں کا عکس پیش کرتے ہیں۔سائنس دانوں نے بتایا کہ اس ہی سے ملتے جلتے نام کی کہکشاں اسپائیڈر ویب گیلیکسی بھی موجود ہے لیکن اس کے خد و خال مکمل طور پر واضح ہیں۔
