اس سال غزہ میں رمضان انتہائی تکلیف دہ حالات میں آیا ہے۔ جو بائیڈن

غزہ میں کم از کم 6 ہفتوں تک فوری اور دیرپا جنگ بندی کے لیے کوششیں جاری رہیں گی۔
واشنگٹن:امریکی صدر جوبائیڈن نے امت مسلمہ کو رمضان کی مبارکباد دیتے ہوئے فلسطینی عوام کے مصائب کا ذکر کیا اور غزہ میں جنگ بندی کے لیے کوششیں جاری رکھنے کے عزم کا اعادہ کیا۔
امریکی میڈیا کے مطابق صدر جو بائیڈن نے اپنے پیغام میں رمضان المبارک کی مبارکباد دیتے ہوئے کہا کہ یہ مقدس مہینہ ایک ایسے وقت میں آیا ہے جب غزہ میں انتہائی تکلیف دہ صورتحال ہے اور فلسطینی عوام شدید مشکلات کا شکار ہیں۔
صدر جبیدن نے کہا کہ جب لوگ افطاری کے لیے جمع ہوں گے تو فلسطینی عوام کے مصائب بہت سے لوگوں کے ذہنوں کے سامنے ہوں گے اور یہ سب میرے ذہن میں بھی ہے۔
امریکی صدر نے مزید کہا کہ مقدس مہینہ ایک ایسے وقت میں آیا ہے جب تقریباً 20 لاکھ فلسطینی جنگ سے بے گھر ہو چکے ہیں اور ان میں سے بہت سے لوگوں کو خوراک، پانی، ادویات اور رہائش کی فوری ضرورت ہے۔
اپنے بیان میں صدر جو بائیڈن نے اس عزم کا بھی اظہار کیا کہ امریکہ زمینی، ہوائی اور سمندری راستے سے غزہ تک مزید انسانی امداد پہنچانے کے لیے بین الاقوامی کوششوں کی قیادت کرتا رہے گا۔
امریکی صدر نے یقین دلایا کہ غزہ میں کم از کم 6 ہفتوں تک فوری اور دیرپا جنگ بندی کے لیے کوششیں جاری رہیں گی تاکہ امدادی سرگرمیاں بغیر کسی رکاوٹ کے جاری رہیں