سوات: مسلم لیگ ن کے قائد نواز شریف نے کہا ہے کہ ایک کروڑ نوکریوں کا وعدہ کرنے والے کے پی کے کے عوام کیسے پھنس گئے۔
نواز شریف نے سوات میں جلسے سے خطاب کرتے ہوئے کہا کہ ایک کروڑ نوکریوں اور 50 لاکھ گھروں کا وعدہ کرنے والے کے جال میں کیسے پھنس گئے، ہاتھ اٹھا کر بتائیں یہاں کتنے لوگ ہیں جنہیں 50 لاکھ گھروں میں سے ایک گھر ملا؟ خیبرپختونخوا کے لوگ بہت سادہ لوگ ہیں، کیا آپ کو شرم نہیں آتی ان کو دھوکہ دیتے ہوئے؟ عوام سے جھوٹے وعدے کیوں کیے گئے؟ عوام کے جذبات سے کھیل کر ووٹ لیا، بعد میں نہ نوکریاں دی گئیں اور نہ ہی کوئی ریلیف۔
انہوں نے کہا کہ میں پورا راستہ دیکھتے آیا ہوں، مجھے تو کوئی ایک بلین ٹری سونامی نظر نہیں آیا ، جذبات سے کھیل کر ووٹ لیا اور بعد میں نہ نوکری دی اور نہ ہی کوئی ریلیف دیا۔ اس عمل میں آپ نے پرانے پاکستان کو بھی تباہ کر دیا۔
نواز شریف نے کہا کہ میں نے پاکستان سے لوڈشیڈنگ خاتمہ کیا تھا، پھر بھی آپ اس شخص کے پیچھے لگے، اگرنواز شریف کی حکومت ہوتی تو خیبرپختونخوا سب سے خوبصورت صوبہ ہوتا، میں آپ سے پوچھنا چاہتا ہوں کہ آپ نے اسے موقع کیوں دیا۔ وہ اس صوبے سے پنجاب ایکسپورٹ ہوا ہے، آپ اس کے جال میں پھنس گئے اور باقی ملک کو بھی پھنسا لیا ہے۔ اللہ سے معافی مانگیں اور اس رجوع کریں’ جن کو آپ نے پہلے آزمایا ہے ان کو بار بار آزمانا ٹھیک نہیں ہے’ پہلے تو آپ کو چکر دیا گیا ہے’8 فروری کو مجھے نہ چکر دے دینا۔
رہنما مسلم لیگ ن کا کہنا تھا کہ ہم نے حکومت نہ ہونے کے باوجود ٹنل بنائی۔ مجھے بتائیں کہ انہوں نے کیا بنایا؟ ٹنل ہم بنائیں اور ووٹ کسی اور کو دیں۔ ہم سے وعدہ کریں کہ ہم آئندہ ایسا نہیں کریں گے۔ آئندہ اس قسم کی سازش میں نہیں آؤں گا، مسلم لیگ ن کو ووٹ دیں گے تو خیبرپختونخوا کی تقدیر بدل دیں گے۔
