رمضان شروع ہوتے ہی مسلمان نیویارک ٹائمز اسکوائر پر نماز ادا کرنے کیلئے جمع

۔ نیویارک کے ٹائمز سکوائر میں رمضان المبارک کے آغاز کے موقع پر درجنوں مسلمان نماز ادا کرنے کے لیے جمع ہوئے۔ انہوں نے غزہ کے مظلوم عوام کے ساتھ اظہار یکجہتی کے لیے فلسطینی پرچم بھی بلند کیا۔ عرب نیوز کی رپورٹ کے مطابق سعودی عرب، متحدہ عرب امارات اور قطر سمیت خلیجی ممالک میں آج (10 مارچ) کو پہلا روزہ ہے۔ جیسے ہی مقدس مہینہ شروع ہوتا ہے، مسلمان نیویارک ٹائمز اسکوائر میں نماز تراویح ادا کرتے ہیں۔ نمازیوں میں سے ایک 20 سالہ سلمان الحنفی نے کہا کہ میں ہر جگہ مسلمانوں کو دیکھ کر حیران ہوں، میں یہاں پہلی بار آیا ہوں۔ نیویارک میں شدید سردی اور ٹھنڈی ہوا کے باوجود مسلمانوں کی بڑی تعداد نماز کے لیے جمع ہوئی، جن میں خواتین اور بچے بھی شامل تھے۔ وہاں موجود ایک نمازی نے کہا کہ اجتماعی دعائیں لوگوں کو یہ جاننے میں مدد دینے کے لیے اہم ہیں کہ دنیا بھر میں کیا ہو رہا ہے۔ غزہ کے ساتھ اظہار یکجہتی کے لیے، کچھ لوگوں نے فلسطینی پرچم کے سرخ، سفید، سبز اور سیاہ رنگوں والی ٹوپیاں پہن رکھی تھیں، جب کہ الیکٹرک وہیل چیئر پر ایک نوجوان لڑکے نے بینر اٹھا رکھا تھا۔ اسرائیل غزہ جنگ کے بعد سے نیویارک میں فلسطینیوں کے ساتھ اظہار یکجہتی کے لیے درجنوں مظاہرے کیے جا چکے ہیں۔