ایسٹ لندن: آئی سی سی انڈر 19ورلڈ کپ میں پاکستان نے مسلسل تیسرا میچ جیت لیا۔
ہفتہ کو جنوبی افریقہ کے شہر ایسٹ لندن میں کھیلے گئے میچ میں پاکستان انڈر 19ٹیم نے نیوزی لینڈ کی انڈر 19ٹیم کو 10 وکٹوں سے شکست دے کر شاندار کامیابی سمیٹی۔
نیوزی لینڈ نے پاکستان کو جیت کے لیے 141رنز کا آسان ہدف دیا تھا جسے اوپنرز شاہ زیب خان اور شمائل حسین نے 25.2 اوورز میں باآسانی حاصل کر لیا۔ شاہ زیب خان نے 80 اور شمائل حسین نے 54 رنز کی ناقابل شکست اننگز کھیلی۔
اس سے قبل نیوزی لینڈ کا ٹاس جیت کر پہلے بیٹنگ کرنے کا فیصلہ غلط ثابت ہوا۔ نیوزی لینڈ کی پوری ٹیم 38اوورز میں صرف 140رنز پر آل آٹ ہوگئی۔
عرفات منہاس نے پانچ اوورز میں چھ رنز دے کر تین وکٹیں حاصل کیں جن میں دو میڈن اوورز بھی شامل ہیں جبکہ عبید شاہ نے بھی تین وکٹیں حاصل کیں۔ علی اسفند اور محمد ذیشان نے ایک ایک کھلاڑی کو پویلین کی راہ دکھائی۔
ٹورنامنٹ میں دوسری بار شاہ زیب خان کو شاندار اننگز کھیلنے پر مین آف دی میچ قرار دیا گیا۔ پاکستان گروپ ڈی میں 6 پوائنٹس کے ساتھ سرفہرست ہے۔
یاد رہے کہ اپنے پہلے میچ میں پاکستان نے افغانستان کو 181رنز اور نیپال کو پانچ وکٹوں سے شکست دی تھی۔
