آپ کا مستقبل اور ترقی نواز شریف سے جڑی ہے’ مریم نواز

مریم نواز شریف نے کہا کہ خواتین گھروں میں گیس نہ ہونے کی وجہ سے رو رہی ہیں، سیاسی مخالفین کو رلانے والوں کے پیدا کردہ مسائل سے آج پورا پاکستان رو رہا ہے، پوری دنیا نواز شریف کی ترقی کی مثالیں دیتی ہے۔ لاہور کی ترقی کی مثالیں دی گئیں لیکن اب وہی لاہور گندگی کا ڈھیر بن گیا۔
انہوں نے کہا کہ نواز شریف اور شہباز شریف کی خدمت کے نشان پورے پاکستان، پنجاب اور لاہور میں ہیں۔ خدمت کرنا مشکل کام ہے لیکن اس امتحان میں صرف نواز شریف اور شہباز شریف ہی ٹاپ پر آئے۔ لوگ جانتے ہیں کہ کام کس نے کیا۔ کس نے سیاسی انتقام لیا، کس نے جھوٹ بولا۔
مریم نواز نے کہا کہ مسلم لیگ(ن) پر بہت برا وقت آیا لیکن کوئی بڑا یا چھوٹا لیڈر، کارکن یا کونسلر پیچھے نہیں رہا۔ مسلم لیگ (ن) ایک خاندان نہیں، خون کے رشتوں سے زیادہ جڑی ہوئی ہے، کارکن آپس میں قریبی بھائیوں کی طرح ہیں۔ گزشتہ روز کارکن گاڑی سے گر کر زخمی ہوگیا جو کہ انتہائی افسوسناک ہے، زخمی کارکن کو فون کرکے خیریت دریافت کی، زخمی بچے نے کہا کہ نواز شریف کی جان بھی حاضر ہے اور یہ ہمارے کارکنوں کا جذبہ ہے۔
انہوں نے کہا کہ آپ کا مستقبل اور ترقی نواز شریف سے جڑی ہے، نواز شریف کو باہر نکال دو، ملک میں بربادی کے سوا کچھ نہیں بچے گا، جب کہ شہباز شریف کے دور میں پنجاب میں ہر منصوبہ اور ہر کام میرٹ کی بنیاد پر ہوا۔
مریم نواز نے کہا کہ پانی، بجلی اور گیس سمیت عوام کا ہر مسئلہ حل کریں گے۔ انہوں نے اگلے پانچ سال عوام کی خدمت کا ایجنڈا بنایا ہے۔ کارکن میرے بھائی اور بازو بن کر باہر نکلیں۔ نواز شریف کا ساتھ دیں۔