![](https://dailyakhbarehaq.com/wp-content/uploads/2024/01/pak-new-zealand-2-2.jpg)
پاکستان نے نیوزی لینڈ کو پانچویں اور آخری ٹی 20 انٹرنیشنل میچ 42 رنز سے شکست دے دی ۔ پاکستان نے پہلے بیٹنگ کرتے ہوئے 8 وکٹوں کے نقصان پر 134 رنز کا مجموعہ ترتیب دیا جس میں محمد رضوان کے 38 اور فخر زمان کے 33 رنز شامل تھے ۔ میزبان ٹیم ہدف کا تعاقب نہ کر سکی اور پوری ٹیم 18 ویں اوور میں 92 رنز بنا کر آؤٹ ہو گئی ۔ افتخار احمد نے تین وکٹیں حاصل کیں ، انہیں میچ کا بہترین کھلاڑی قرار دیا گیا ، واضح رہے پانچ میچوں کی سیریز 1-4 سے نیوزی لینڈ کے نام رہی۔ اتوار کو ہیگلے اوول ، کرائسٹ چرچ میں کھیلے گئے۔ میچ میں پاکستان کے کپتان شاہین شاہ آفریدی نے ٹاس جیت کر بیٹنگ کا فیصلہ کیا جو درست ثابت ہوا ۔
گرین شرٹس نے مقررہ 20 اوورز میں 8 وکٹوں کے نقصان پر 134 رنز بنائے ، محمد رضوان نے 38 رنز کی عمدہ اننگز کھیلی جبکہ فخر زمان نے دھواں دار بیٹنگ کا مظاہرہ کیا اور 16 گیندوں پر 4 چھکوں اور ایک چوکے کی مدد سے 33 رنز بنائے ، ڈیبیو کرنے والے اوپنر حسیب اللّٰہ خان بغیر کوئی رن بنائے پویلین لوٹ گئے جبکہ بابر اعظم 13، محمد نواز ایک ، افتخار 5 ، صاحبزادہ فرحان 19 اور شاہین شاہ آفریدی ایک رن بنا کر آؤٹ ہوئے ، عباس آفریدی 14 رنز بنا کر ناٹ آؤٹ رہے۔ نیوزی لینڈ کی جانب سے ٹم ساؤدی ، میٹ ہینری ، لوکی فرگیوسن اور ایش سودھی نے دو ، دو وکٹیں حاصل کیں ۔نیوزی لینڈ کی ٹیم مطلوبہ ہدف حاصل کرنے میں ناکام رہی اور پوری ٹیم 17.2 اوورز میں 92 رنز بنا کر آؤٹ ہو گئی ۔ فن ایلن 22 ، ریچن روندرا ایک ، ٹم سیفرٹ 19 ، ول ینگ 12 ، مارک چیپمین ایک ، گلین فلپس 26 ، مچل سینٹنر 4 ، میٹ ہینری ایک ، ایش سودھی ایک اور لوکی فرگیوسن بغیر کوئی رن بنائے آؤٹ ہوئے ۔ پاکستان کی طرف سے افتخار احمد نے تین ، شاہین شاہ آفریدی اور محمد نواز نے دو ، دو جبکہ زمان خان اور اسامہ میر نے ایک ، ایک وکٹ حاصل کی ، افتخار احمد کو پلیئر آف دی میچ قرار دیا گیا جبکہ نیوزی لینڈ کے فن ایلن سیریز کے بہترین کھلاڑی قرار پائے