قومی اسمبلی کے 6 اور صوبائی اسمبلی کے7 حلقوں پر ضمنی انتخابات کی انتخابی مہم کا وقت رات 12 بجے ختم ہوگیا۔الیکشن کمیشن نے انتخابی ضابطہ اخلاق کی خلاف ورزی کرنے والوں کے خلاف کارروائی کی وارننگ دی ہے۔ الیکشن کمیشن کے مطابق قومی اسمبلی کی 6 اور پنجاب اسمبلی کی 7 نشستوں پر کل ووٹ ڈالے جائیں گے ۔ قومی اسمبلی کے حلقوں این اے 18 ہری پور ، این اے 96 فیصل آباد ، این اے 104 فیصل آباد ، این اے 129 لاہور، این اے 143 ساہیوال اور این اے 185 ڈی جی خان میں ضمنی الیکشن ہوگا۔پنجاب اسمبلی کی پی پی 98 بھکر ، پی پی 115 اور 116 فیصل آباد، پی پی 73 سرگودھا ، پی پی 87 میانوالی، پی پی 203 ساہیوال اور پی پی 269 مظفرگڑھ پر بھی کل ووٹنگ ہوگی۔یاد رہے کہ وزارت داخلہ نے کل ہونے والے ضمنی الیکشن کے دن سول آرمڈ فورسز اور پاک فوج کی تعیناتی کا آرڈر جاری کر دیا ہے۔نوٹیفکیشن کے مطابق ضمنی الیکشن کے دن سے عام فورسز دوسرے درجے پر بطور کوئیک ری ایکشن فورس تعینات رہیں گی۔ ضمنی الیکشن کے دن پاکستانی فوج بطور کوئیک ری ایکشن فورس تیسرے درجے پر تعینات رہیں گی۔الیکشن کمیشن نے بھی کل کے ضمنی انتخابات کے لیے پاکستان آرمی، سول آرمڈ فورسز اور مقامی پولیس کی تعیناتی کا نوٹیفکیشن جاری کر دیااور نامزد عسکری و سول افسران کو مجسٹریٹ درجہ اول کے اختیارات بھی تفویض کیے ہیں۔
