تحریک انصاف کے سیکرٹری جنرل سلمان اکرم راجہ نے کہا ہےکہ گزشتہ روز جو الزامات لگائے گئے اس کی کوئی بنیاد نہیں۔ایک بیان میں سلمان اکرم راجہ نے کہا کہ ہم کہتے ہیں جامع حکمت عملی بنادیں، جو معصوم آپریشن میں شہید ہوتے ہیں وہ نہ ہو، ہم دہشتگرد کو دھرتی سے دور کرنا چاہتے ہیں۔انہوں نے کہا کہ گزشتہ روز جو الزامات لگائے گئے اس کی کوئی بنیاد نہیں۔دوسری جانب پشاور میں پریس کانفرنس کرتے ہوئے خیبرپختونخوا کے صدر جنید اکبر نے کہا کہ اس وقت خیبرپختونخوا میں مینڈیٹ ہماری پارٹی کے پاس ہے لیکن وفاقی حکومت اور ادارے کوشش کررہے ہیں کہ وزیراعلیٰ کے انتخاب میں رکاوٹیں ڈالیں۔انہوں نے کہا کہ سہیل آفریدی تعلیم یافتہ اور ایماندار شخص ہیں، پارٹی سہیل آفریدی کے ساتھ ہے اور ہمارے 92 ایم پی ایز انہیں ووٹ دیں گے، ہم سے دیگر پارٹی کے رہنما بھی رابطے میں ہیں اور دیگر پارٹیوں کا اچھا رسپانس آرہا ہے۔ان کا کہنا تھا کہ علی امین کا شکریہ کہ ایک منٹ ضائع نہیں کیا اور بانی پی ٹی آئی کے کہنے پر استعفیٰ دیا۔پی ٹی آئی خیبرپختونخوا کے صدر نے مزید کہا کہ ہم نے کھل کر کہا ہے طالبان سے بات چیت چاہتے ہیں، ہماری پالیسیوں پر کے پی کے عوام نے اعتماد کیا، عوام کہتے ہیں کہ بات چیت سے مسئلہ حل کریں لہٰذا آئیں مل بیٹھ کر اس مسئلے کا حل تلاش کریں۔
