قومی ٹیم کے عبوری ہیڈکوچ ریڈ بال کرکٹ ٹیم اظہر محمود نے ایشیا کپ ٹی ٹوئنٹی کے سپر فور مرحلے میں بھارت سے اہم میچ کے موقع پر بابر اعظم کے دبئی جانے کی خبروں کی تردید کر دی ہے۔خیال رہےکہ ٹی ٹوئنٹی انٹرنیشنل کی تاریخ میں دوسرے نمبر پر سب سے زیادہ رنز بنانے والے بابراعظم گزشتہ سال دسمبر میں جنوبی افریقاکے خلاف تین میچوں کی سیریز کے بعد سے ٹی ٹوئنٹی اسکواڈ میں شامل نہیں۔ایشیا کپ میں سپرفور مرحلےکے موقع پر سوشل میڈیا پر بابر کے دبئی جانے اور پاکستانی اسکواڈ میں شامل ہونےکی خبریں گردش کر رہی تھیں۔اس موقع پر ہیڈکوچ ریڈ بال اظہر محمود نے بابر اعظم کے ساتھ تصویر سوشل میڈیا پر پوسٹ کی جس میں دکھایا گیا کہ وہ گالف کورس میں موجود ہیں۔اظہر محمود نے ان خبروں کی تردید کی کہ بابر اعظم دبئی جا چکے ہیں اور کہا کہ بریکنگ نیوز میں بابر اعظم کو دبئی میں دیکھا گیاہے، بابراعظم نے تو لاہور کے خوبصورت گالف کورس پر میرے ساتھ گالف کھیلی ہے۔خیال رہے کہ دبئی میں پاکستان اور بھارت کی ٹیمیں آج ایشیاکپ کے سپر فور مرحلے میں ٹکرائیں گی۔پاکستان اور بھارت کے درمیان میچ آج شام ساڑھے 7 بجے شروع ہوگا۔
