کراچی میں 2 روز کی بارش کے دوران پریشانی پر وزیراعلیٰ سندھ سید مراد علی شاہ نے شہریوں سے معذرت کر لی۔ گفتگو کرتے ہوئے مراد علی شاہ کا کہنا تھا کہ کراچی میں 200 ملی میٹر بارش سے اربن فلڈنگ ہوئی، 3 گھنٹے موسلادھار بارش کے بعد بٹن دبا کر سارا پانی نہیں نکال سکتے ۔دوران گفتگو وزیراعلیٰ سندھ نے بارش کے بعد پیش آنے والی مشکل صورتحال پر شہریوں سے معذرت بھی کی۔ دوسری جانب وزیراطلاعات سندھ شرجیل میمن نے پریس کانفرنس میں کہا کہ برسات وقفے وقفے سے ہوتی تو مسائل اتنے نہ ہوتے، بلدیہ عظمیٰ نے تمام مرکزی نالوں کی ایڈوانس میں صفائی کرائی ہوئی تھی ، جب پانی کی مقدار زیادہ ہوگی تو نکلنے میں وقت لگے گا ۔اس حوالے سے میئر کراچی مرتضی وہاب کا کہنا تھا کہ کراچی کی تمام بڑی سڑکیں اس وقت کلیئر ہیں اور کہیں پر بھی بارش کا پانی جمع نہیں ۔انھوں نے مزید کہا کہ ایف بی ایریا میں لگے جماعت کے جھنڈوں پر غور نہ کریں یہ کام ہم نے کرایا ہے، نالوں کی بروقت صفائی کی وجہ سے گراؤنڈ پر صورتحال بہتر ہے۔خیال رہے کہ کراچی میں منگل کے روز وقفے وقفے سے ہونے والی موسلا دھار بارش نے پورا شہر ڈبو دیا تھا جس کے باعث شہر میں اربن فلڈنگ کی صورتحال پیدا ہوئی، نشیبی علاقے زیر آب آگئے اور مختلف حادثات میں 17 افراد جاں بحق بھی ہوئے۔
