پاکستان کے ہاکی اولمپئنز کا ایشیا کپ ہاکی ٹورنامنٹ بھارت سے منتقل کرنے کا مطالبہ

پاکستان کے ہاکی اولمپئنز نے ایشیا کپ ہاکی ٹورنامنٹ بھارت سے کسی دوسرے ملک منتقل کرنے کا مطالبہ کر دیا۔لاس اینجلس اولمپکس 1984کے گولڈ میڈلسٹ ہاکی اولمپئن توقیر ڈار کا کہنا ہے کہ بھارت اور پاکستان کے درمیان جنگ کی صورتحال ہے، انہوں نے ہمارا پانی بند کیا ہوا ہے ہم کیسے سوچ سکتے ہیں کہ ہمارے کھلاڑی وہاں جائیں اور کھیلیں۔انہوں نے کہا کہ اگر کھلاڑی چلے بھی جاتے ہیں تو جو ماحول ان کو دیا جائے گا وہ ایک قید ہو گی اور قید میں کھلاڑی کیا پرفارم کریں گے۔اولمپئن توقیر ڈار نے مزید کہا کہ ایشیا کپ کو نیوٹرل وینیو پر منتقل کرنا ہو گا، اگر شفٹ نہیں کرنا تو پھر پاکستان کے میچز نیوٹرل وینیو پر کرائیں۔دوسری جانب اولمپئن خواجہ جنید نے کہا کہ ایشیا کپ کیلئے بھارت جانے کیلئے حکومت جو فیصلہ کرے اس کے مطابق چلنا چاہیے، ہم اس وقت بھارت کے ساتھ حالت جنگ میں ہیں جو اب صورتحال ہے وہ اس سے پہلے کبھی نہیں تھی۔انہوں نے کہا کہ ایشیا کپ کے لیے نیوٹرل وینیو ہی ترجیح ہونی چاہیے، پی سی بی کے چیئرمین محسن نقوی کی طرح سخت مؤقف اپنانا چاہیے، پاکستان ہاکی فیڈریشن کو چاہیے کہ وہ ایشیا کپ میں اپنے میچز کے لیے نیوٹرل وینیو کا مطالبہ کرے، اگر نیوٹرل وینیو کو نہیں مانا جاتا تو بھارت سے ایونٹ کو تبدیل کر دینا چاہیے۔