لاہور: وزیر اطلاعات پنجاب عظمیٰ بخاری کا کہنا ہے کہ مراد علی شاہ کو علی امین گنڈا پور سے مختلف نظر آنا چاہیے، انہیں سندھ سے زیادہ پنجاب کے کسانوں کی فکر ہے، مراد علی شاہ اپنی کارکردگی بتائیں۔نہروں کے معاملے پر وزیراعلیٰ سندھ کی پریس کانفرنس پر ردعمل دیتے ہوئے وزیر اطلاعات پنجاب عظمیٰ بخاری کا کہنا تھا کہ پنجاب کے کسانوں کی فکر کرنے کے لیے پنجاب کے وارث موجود ہیں، کیا سندھ میں کاشت کار نہیں؟کیا سندھ حکومت نے گندم کی قیمت مقرر کردی؟ کیا سندھ حکومت نے کسانوں سے گندم خریدلی؟عظمیٰ بخاری کا کہنا تھا کہ مراد علی شاہ اور ان کی جماعت 16سال سے حکمران ہے، اپنی کارکردگی بتائیں، مریم نواز نے ایک سال میں پنجاب کےکسانوں کو 110 ارب روپےکا تاریخی پیکج دیا،مریم نواز نے پنجاب کے کسانوں کو کسان کارڈ،گرین ٹریکٹر، سپر سیڈر دیے ہیں، مریم نواز نے ٹیوب ویلز سولرائزیشن اور گندم پر 15ارب کا پیکج دیا ہے، پنجاب میں اس سال ریکارڈ گندم کی پیداوار ہوئی ہے، آئندہ سال اس سے بھی زیادہ گندم کی پیداوار ہوگی۔ ان کا کہنا تھا کہ پنجاب کی ترقی و خوشحالی دو صوبوں کی حکومتوں کے اعصاب پر سوار ہو چکی ہے۔انہوں نے الزام لگایا کہ مراد علی شاہ مرکزی شاہراہ کو بند کرنے والے مظاہرین کی حمایت کر رہے، مراد علی شاہ کو گنڈا پور سے مختلف نظر آنا چاہیے۔
