راولپنڈی (نیوز ڈیسک)احتساب عدالت نے بانی پی ٹی آئی عمران خان کی 190 ملین پائونڈ ریفرنس میں بریت کی درخواست کو مسترد کردیا۔190 ملین پائونڈ ریفرنس کی سماعت احتساب عدالت کے جج ناصر جاوید رانا نے اڈیالہ جیل میں کی۔بانی پی ٹی آئی عمران خان اور اہلیہ بشری بی بی کو کمرہ عدالت میں پیش کیا گیا۔ ریفرنس کے آخری گواہ تفتیشی افسر میاں عمر ندیم پر آج جرح نہ ہوسکی۔سماعت کے آغاز پر بانی پی ٹی آئی کے وکیل چوہدری ظہیر عباس اور عثمان گل نے بریت کی درخواست پر دلائل دیے۔وکلا صفائی نے موقف اپنایا کہ سپریم کورٹ کے نیب ترامیم فیصلے کے بعد یہ کیس بنتا ہی نہیں، نیب ترامیم کی روشنی میں کابینہ کے فیصلوں کو تحفظ حاصل ہے جبکہ بانی پی ٹی آئی نے براہ راست کوئی مالی فوائد حاصل نہیں کیے۔جس پر نیب پراسیکیوشن ٹیم کی جانب سے بریت کی درخواست کی مخالفت کی گئی اور نیب پراسیکیوٹرز نے مقف اپنایا کہ بانی پی ٹی آئی نے کابینہ کو مِس گائیڈ کیا ہے، کابینہ کے سامنے 190 ملین پانڈ سے متعلق اصل حقائق کو چھپایا گیا۔واضح رہے کہ عدالت نے پہلے ہی عمران خان کی اہلیہ بشری بی بی کی درخواست بریت پر فیصلہ ریفرنس کے حتمی فیصلے کے ساتھ منسلک کر رکھا ہے۔
