لاہور(نیوز ڈیسک)خیبرپختونخوا حکومت نے وزیراعلی کے پی کو سکیورٹی نہ ملنے پر پنجاب حکومت کو خط لکھ دیا۔وزیراعلی خیبرپختونخوا کے پرنسپل سیکرٹری عابد مجید نے علی امین گنڈاپور کو پنجاب میں سکیورٹی نہ ملنے پر وزیراعلی پنجاب کے پرنسپل سیکرٹری ساجد ظفر ڈال کو شکایتی خط ارسال کیا۔کے پی حکومت کی جانب سے بھیجے گئے خط میں کہا گیا کہ ملک بھر میں وی وی آئی پیز کو سکیورٹی فراہم کی جاتی ہے لیکن وزیراعلی خیبرپختونخوا علی امین گنڈاپور کو فیصل آباد میں سکیورٹی نہیں دی گئی۔خط میں کہا گیا کہ خیبر پختونخوا حکومت پنجاب اور وفاق کے وزرا اور سینیئر افسران کو بھی سکیورٹی اور پروٹوکول فراہم کرتی ہے تاہم وزیراعلی علی امین گنڈاپور کو پنجاب میں کوئی سکیورٹی نہیں دی گئی۔پرنسپل سیکرٹری کے پی نے اپنے خط میں لکھا کہ ایس ایس پی آپریشنز فیصل آباد کو وزیراعلی علی امین گنڈاپور کے دورے سے سے متعلق پیشگی آگاہ کیا گیا تھا، سکیورٹی صورتحال کے پیش نظر وزیراعلی علی امین گنڈاپور کو سکیورٹی ملنی چاہییتھی۔خط میں مطالبہ کیا گیا کہ معاملہ وزیراعلی پنجاب کے نوٹس میں لایا جائے اور وزیراعلی خیبر پختونخوا کو سکیورٹی نہ ملنے پر انکوائری کی جائے۔خط میں یہ بھی مطالبہ کیا گیا کہ پنجاب پولیس کو اس بارے سخت ہدایات جاری کی جائیں۔
