![صوبائی حکومتیں سکیورٹی کی ذمہ داری فوج پر ڈال کر بری الذمہ نہیں ہوسکتیں: وزیراعظم](https://dailyakhbarehaq.com/wp-content/uploads/2024/06/اپیکس-کمیٹی1.jpg)
وزیراعظم شہباز شریف نے کہا ہے کہ صوبائی حکومتیں سکیورٹی کی ذمہ داری فوج پر ڈال کر بری الذمہ نہیں ہوسکتیں، ریاست کو صرف ایک ادارے پر چھوڑنا فاش غلطی ہوگی، ہم سب کو ذمہ داری لینا ہوگی۔
نیشنل ایکشن پلان اپیکس کمیٹی کے اجلاس سے خطاب میں شہباز شریف کا کہنا تھاکہ دہشت گردی کا مسئلہ پیچیدہ ہے، ملک کی پائیدار ترقی کیلئے استحکام اورقانون کی حکمرانی ضروری ہے، ریاست کی عمل داری کو نافذ کرنا میری اورہم سب کی ذمیداری ہے، دہشتگردی کیخلاف جنگ کی ذمے داری ریاست کے تمام اداروں کااولین فرض ہے۔
انہوں نے کہا کہ مکمل نظام کے بغیر پائیدار ترقی کا تصور بھی نہیں کیا جاسکتا، توقع ہے صوبے دہشتگردی کیخلاف بھرپورحصہ ڈالیں گے اور مل کر دہشتگردی کے ناسور کا خاتمہ کرینگے، دہشتگردی کے خلاف جنگ کیلئے ہماری سیاسی اورمذہبی قیادت کا پوری طرح واضح ہونا ضروری ہے۔
ان کا کہنا تھاکہ یہ جنگ ہماری اپنی ہے، کسی غیر کی جنگ نہیں لڑ رہے، ہمیں ذمے داری خود لینا ہوگی،ایک ادارے پرذمہ داری ڈالنا فاش غلطی ہوگی، صوبائی حکومتیں سکیورٹی کی ذمہ داری فوج پر ڈال کر بری الذمہ نہیں ہوسکتیں، نرم ریاست سرمایہ کاروں کا اعتماد حاصل نہیں کر سکتی، ہمیں طاقت کے تمام عناصر کے درمیان ہم آہنگی کی ضرورت ہے، دہشتگردی کیخلاف جنگ میں پوری قوم کو شامل کرنے کیلئے فعال کردار ادا کرنا ہوگا۔
وزیراعظم کا کہنا تھاکہ افواج دہشتگردی کیخلاف جو جنگ کر رہی ہے اس کے اخراجات وفاق اٹھاتا ہے، حکومت کی آوازکو مضبوط بنانے کیلئے قوانین بنائیں گے، دہشتگردی کیخلاف فوج کی ضروریات پوری کرنیمیں کوئی کثر نہیں اٹھا رکھیں گے۔
انہوں نے کہا کہ ہمیں علاقائی ممالک کے ساتھ فعال سفارتکاری کی ضرورت ہوگی، ہمیں قانون سازی کے ذریعے قانون نافذ کرنیوالے اداروں کو مضبوط بنانا ہوگا، دہشتگردی کے خلاف جنگ کیلئے تمام وسائل فراہم کریں گے، ریاست کی عملداری کو پوری قوت سے نافذکرنا ہماری مشترکہ ذمہ داری ہے، دہشتگردی میں مبتلا غیرمستحکم ریاست میں اچھی معیشت کا تصور نہیں کیا جاسکتا۔
دورہ چین کے حوالے سے منفی مہم پر شہباز شریف کا کہنا تھاکہ قومی بیانیے کو داغدار بنانے کی مہم کو ناکام بنانا ہوگا، پاکستان کے دشمنوں نے سوشل اسپیس کو زہر آلود کر رکھا ہے، دورہ چین کے موقع پر بھی منفی مہم چلائی گئی۔
انہوں نے کہا کہ پاکستان کے دشمنوں نے سوشل اسپیس کوزہرآلودکر رکھا ہے، ہمیں ایسے قوانین بنانے ہوں گے جو نفرت کی زبان کوختم کرسکیں اور یقینی بنائیں گے کہ غلط معلومات اورجھوٹ سچائی کو نہ چھپاسکے، اظہار رائے کا غلط استعمال اورآئین کی دھجیاں اڑانے سے بڑاکوئی جرم نہیں ہوسکتا، ایسے قوانین بنانے ہوں گے جو نفرت اورتقسیم کے بیانیے ختم کرسکیں۔
ازم استحکام آپریشن کے ذریعے ملک سے انتہا پسندی اور دہشت گردی کا خاتمہ کیا جائے، ایک جامع اور فیصلہ کن انداز میں انتہا پسندی اور دہشت گردی کے خطرات سے نمٹنے کے لیے کوششوں کے متعدد خطوط کو مربوط اور ہم آہنگ کرے گا جبکہ سیاسی سفارتی دائرہ کار میں علاقائی تعاون کے ذریعے دہشت گردوں کی سرگرمیوں کو روکنے کی کوششیں تیز کی جائیں گی۔
مسلح افواج کی تجدید اور بھرپور متحرک کوششوں کو تمام قانون نافذ کرنے والے اداروں کی مکمل حمایت سے بڑھایا جائے گا، دہشت گردی سے متعلقہ مقدمات کی مؤثر کارروائی میں رکاوٹ بننے والے قانونی خلا کو دور کرنے کے لیے موثر قانون سازی کی جائے گی تاکہ ملزمان کو مثالی سزائیں دی جائیں۔
اس مہم کو سماجی و اقتصادی اقدامات کے ذریعے مکمل کیا جائے گا۔ جس کا مقصد لوگوں کے حقیقی خدشات کو دور کرنا اور انتہا پسندانہ رجحانات کی حوصلہ شکنی کرنے والا ماحول بنانا ہے۔
فورم نے اس بات کا اعادہ کیا کہ انتہا پسندی اور دہشت گردی کے خلاف جنگ پاکستان کی جنگ ہے اور یہ قوم کی بقا اور بہبود کے لیے بالکل ضروری ہے، فورم نے فیصلہ کیا کہ کسی کو بغیر کسی رعایت کے ریاست کی رٹ کو چیلنج کرنے کی اجازت نہیں دی جائے گی۔
فورم نے پاکستان میں چینی شہریوں کے لیے فول پروف سیکیورٹی کو یقینی بنانے کے اقدامات کا بھی جائزہ لیا۔ وزیراعظم کی منظوری کے بعد متعلقہ محکموں کو نئے اسٹینڈرڈ آپریٹنگ پروسیجرز (ایس او پیز) جاری کیے گئے، جس سے پاکستان میں چینی شہریوں کو جامع سیکیورٹی فراہم کرنے کے طریقہ کار میں اضافہ ہوگا۔