![نیلی اور میں شادی کرنا چاہتے تھے، جاوید شیخ کا انکشاف](https://dailyakhbarehaq.com/wp-content/uploads/2024/05/جاوید-شیخ1.jpg)
سینیئر اداکار جاوید شیخ نے انکشاف کیا ہے کہ ماضی میں وہ اور نیلی ایک دوسرے سے شادی کرنا چاہتے تھے لیکن افسوس کہ ایسا نہ ہوسکا۔
جاوید شیخ ماضی میں متعدد انٹرویوز میں اداکارہ نیلی کے ساتھ معاشقے اور تعلقات پر کھل کر بات کر چکے ہیں۔حال ہی میں انہوں نے انٹرویو میں ایک بار پھر نیلی کا ذکر چھیڑا اور ان کی لمبی اور صحت مند زندگی کے لیے دعائیں کیں۔جاوید شیخ نے انٹرویو کے دوران ایک سوال کے جواب میں اس دعوے کو مسترد کیا کہ وہ یا نیلی فلم سازوں پر ایک ساتھ فلم میں کاسٹ کرنے کے حوالے سے دباو ڈالتے تھے۔
جب ان سے پوچھا گیا کہ کیا ماضی میں وہ یا نیلی فلم سازوں پر یہ دباو ڈالتے تھے کہ انہیں ایک ساتھ کاسٹ کیا جائے تو اس پر اداکار نے جواب دیا کہ ایسا کبھی نہیں کیا۔جاوید شیخ کا کہنا تھا کہ وہ اور اداکارہ نیلی اپنے دور کے بڑے فنکار تھے، دونوں کو خدا نے شہرت دی تھی، دونوں کے پاس ٹیلنٹ تھا، انہیں فلم پروڈیوسرز یا ڈائریکٹرز کو یہ کہنے کی ضرورت ہی نہیں پڑی کہ انہیں ایک ساتھ کاسٹ کیا جائے۔
ان کا کہنا تھا کہ فلم ساز انہیں خود ہی ایک ساتھ فلموں میں کاسٹ کرتے تھے، انہوں نے کبھی کسی کو ایک ہی فلم میں ایک ساتھ کاسٹ کرنے کا نہیں کہا۔نیلی سے تعلقات اور شادی سے متعلق پوچھے گئے سوال پر جاوید شیخ نے اعتراف کیا کہ ان کا اور اداکارہ کا آپس میں شادی کرنے کا ارادہ تھا۔
جاوید شیخ کے مطابق ان کے اور نیلی کے خیالات، ذہن اور سوچ ملتی تھی، دونوں کے درمیان اچھے تعلقات تھے اور شادی کے معاملے پر بھی متفق تھے۔انہوں نے بتایا کہ ان کا اور نیلی کا شادی کرنے کا ارادہ تھا لیکن ایسا نہ ہوسکا، قسمت کو کچھ اور منظور تھا، ان کے چاہنے کے باوجود ایسا نہ ہوسکا۔
جاوید شیخ نے نیلی کی شخصیت کی تعریفیں کرتے ہوئے انہیں اچھے اخلاق کی خاتون قرار دیتے ہوئے ان کی لمبی اور صحت مند زندگی کی دعائیں بھی کیں۔اداکار نے ایک بار پھر یہ اعتراف کیا کہ نیلی نے ماضی میں ان کا ساتھ دیا اور انہیں زندگی کے مشکل وقت سے نکالا، انہوں نے انہیں اس وقت سہارا دیا جب ان کی دوسری شادی بھی طلاق پر ختم ہوئی۔
ماضی میں بھی ایک انٹرویو میں جاوید شیخ نے اعتراف کیا تھا کہ سلمی آغا سے طلاق پر انہیں سخت صدمہ پہنچا تھا اور انہوں نے اپنا خیال کرنا ہی چھوڑ دیا تھا، اس وقت انہیں اداکارہ نیلی نے سہارا دیا تھا۔
انہوں نے اعتراف کیا تھا کہ طلاق کے صدمے میں نکلنے میں نیلی نے ان کی مدد کی۔