پاکستان فلم اور ڈرامہ انڈسٹری کی مشہور اداکارہ مہوش حیات نے مشہور بھارتی میوزک ریپر یو یو ہنی سنگھ کے ساتھ کام کرنے کا اعلان کیا ہے۔ مہوش حیات نے سوشل میڈیا سائٹ انسٹاگرام پر اپنی نئی تصویر پوسٹ کی جس میں ان کے ساتھ بھارتی میوزک ریپر ہنی سنگھ اور را علی خان بھی ہیں۔ ہنی سنگھ کے ساتھ شیئر کی گئی اپنی مشترکہ پوسٹ میں اداکارہ نے کہا، "میں نے اپنے دیسی فنکار کے ساتھ ایک نئے ٹریک کلر کے لیے تعاون کیا ہے۔ انہوں نے اپنی پوسٹ میں گانے کی ریلیز کی حتمی تاریخ کا اعلان نہیں کیا تاہم انہوں نے یہ ذکر کیا کہ ان کا گانا بہت جلد ریلیز ہونے والا ہے۔ یو ہنی سنگھ اور مہوش حیات کے اعلان کے بعد پاکستان سمیت بھارتی مداح ان کے نئے گانے پر خوشی کا اظہار کر رہے ہیں۔ واضح رہے کہ رواں سال کے آغاز میں مہوش حیات نے بھارتی میوزک ریپر سے ملاقات کی تھی جس کی تصویر ہنی سنگھ نے اپنے انسٹاگرام ہینڈل پر پوسٹ کی تھی۔ اس موقع پر ہنی سنگھ کا کہنا تھا کہ مہوش حیات ایک زندہ دل خاتون ہیں، ان سے مل کر بہت خوشی ہوئی۔
