![اسرائیل کے خان یونس اور رفح میں حملے، بچوں سمیت متعدد فلسطینی شہید](https://dailyakhbarehaq.com/wp-content/uploads/2024/03/rafa-1.jpg)
رفح میں اسرائیلی فوج کے حملے میں بچوں سمیت مزید 5 فلسطینی شہید ہوگئے جب کہ حماس کی جانب سے نہتے شہریوں کو نشانہ بنانے والی اسرائیلی فوج کو بھرپور جواب دیا گیا۔غیر ملکی میڈیا کے مطابق حماس نے الشفا اسپتال کا محاصرہ کر نیوالے فوجی ٹینکوں کو راکٹوں سے تباہ کردیا۔
دوسری جانب اسرائیلی فوج نے خان یونس میں بھی نہتے فلسطینیوں پر ڈرون حملہ کیے جس کے سبب کئی معصوم فلسطینی جاں بحق ہوگئے جب کہ رفح میں اسرائیلی فوج کے حملے میں بچوں سمیت 5 فلسطینی شہید ہوگئے۔
دوسری جانب اسرائیل نے غزہ کی پٹی پر سب سے بڑے الشفا ہسپتال کو پانچ دن تک محصور رکھنے کے بعد آپریشن میں 170 سے زائد مسلح افراد کو مارنے کا دعوی کیا ہے۔خبر رساں ایجنسی اے ایف پی کے مطابق اسرائیلی فوج نے پیر کو الشفا ہسپتال میں آپریشن شروع کیا تھا جہاں ان کا دعوی تھا کہ ہسپتال میں بڑی تعداد میں حماس کے فائٹر موجود ہیں۔
اسرائیلی فوج نے بیان میں کہا کہ اب تک ہسپتال کے حصے میں 170 فائٹرز کو مارا جا چکا ہے، 800 افراد سے پوچھ گچھ کی گئی ہے جبکہ بڑی تعداد میں اسلحے اور دہشت گردی کے نیٹ ورک کا پتا چلا ہے۔
ادھر روس اور چین نے غزہ سے متعلق امریکا کی پیش کردہ سلامتی کونسل قرارداد کو منافقانہ قرار دے کر ویٹو کردیا اور کہا کہ قرارداد میں فوری اور طویل جنگ بندی کی بات نہیں کی گئی، الٹا اس قرارداد میں اسرائیل کو رفح پر حملے کی اجازت دی گئی ہے۔واضح رہے کہ فلسطین کے محصور علاقے غزہ میں اسرائیلی حملوں میں شہید فلسطینیوں کی تعداد 32 ہزار سے تجاوز کرگئی ہے اور 74 ہزار سے زائد زخمی ہیں۔اسرائیلی حملوں میں شہید ہونے والوں میں 13 ہزار سے زائد بچے بھی شامل ہیں۔