عمران خان کو کچھ ہوا تو ذمہ دار موجودہ حکومت اور اسٹیبلشمنٹ ہو گی، شعیب شاہین

اسلام آباد: پاکستان تحریک انصاف کے رہنما شعیب شاہین کا کہنا ہے کہ پی ٹی آئی کے بانی عمران خان کو کچھ ہوا تو ذمہ داری موجودہ حکومت اور اسٹیبلشمنٹ پر عائد ہوگی۔
الیکشن کمیشن کے باہر میڈیا سے بات کرتے ہوئے شعیب شاہین کا کہنا تھا کہ ٹمپرنگ کے بعد کچھ پولنگ اسٹیشنز پر ووٹنگ کی شرح 99.99 فیصد تک بڑھا دی گئی جو بظاہر ناممکن ہے، ہم اس حوالے سے جلد وائٹ پیپر جاری کرنے جارہے ہیں۔
شعیب شاہین نے کہا کہ ہمارے ‘جماعت اسلامی اور ٹی ایل پی سمیت مصطفی نواز کھوکھر کے پاس ایک جیسے فارم 45 ہیں جب کہ طارق فضل چوہدری کے پاس کوئی اور فارم 45 ہے، ہم پرچہ کرکے ریٹرننگ افسر کو فارغ کروائیں گے۔
پی ٹی آئی رہنما کا کہنا تھا کہ آئی ایم ایف سے قرضہ لیں گے تو اشرافیہ کھائے گی اور عوام قرضہ ادا کریں گے۔ عدلیہ ان ڈاکوؤں اور اشرافیہ کو روکے۔
ایک سوال کے جواب میں شعیب شاہین نے کہا کہ تحریک انصاف کے بانی کو قتل کرنے اور ڈرانے کی کوشش کی جا رہی ہے، دہشت گرد پاکستان چھوڑ کر اڈیالہ جیل کیوں گئے؟ یہ ایک سوالیہ نشان ہے۔ بانی پی ٹی آئی کو کچھ ہوا تو ذمہ داری موجودہ حکومت اور اسٹیبلشمنٹ پر عائد ہوگی۔
یاد رہے کہ راولپنڈی پولیس نے دعوی کیا ہے کہ پولیس اور کانٹر ٹیررازم ڈیپارٹمنٹ (سی ٹی ڈی) کی مشترکہ کارروائی سے اڈیالہ جیل کو بڑی تباہی سے بچا لیا گیا ہے۔
مشترکہ کارروائی کے دوران 3 غیر ملکی دہشت گردوں کو گرفتار کر کے اڈیالہ جیل کا نقشہ، خودکار اسلحہ اور بھاری مقدار میں گولہ بارود برآمد کر لیا گیا۔