قومی اسمبلی کے اجلاس میں نومنتخب ارکان نے حلف اٹھا لیا۔
سابق سپیکر قومی اسمبلی راجہ پرویز اشرف کی زیر صدارت اجلاس صبح 10 بجے شروع ہونا تھا تاہم اجلاس مقررہ وقت سے ایک گھنٹے بعد شروع ہوا۔
سپیکر قومی اسمبلی راجہ پرویز اشرف نے نومنتخب ارکان سے حلف لیا، سابق صدر آصف علی زرداری، سابق وزیراعظم نواز شریف، چیئرمین پیپلز پارٹی بلاول بھٹو زرداری، صدر مسلم لیگ (ن) شہباز شریف، سربراہ جے یو آئی مولانا فضل الرحمان , خورشید شاہ، سردار ایاز صادق اور دیگر نو منتخب اراکین بھی حلف لینے والوں میں شامل ہیں
سنی اتحاد کونسل کے عمر ایوب، بیرسٹر گوہر، علی محمد خان نے بھی حلف اٹھایا، جب استحکام پاکستان پارٹی کے علیم خان کو دستخط کے لیے بلایا گیا تو سنی اتحاد کونسل کے اراکین نے لوٹا لوٹا کے نعرے لگائے۔
اس کے علاوہ محمود خان اچکزئی اور سردار اختر مینگل بھی حلف اٹھانے والوں میں شامل ہیں۔ تقریب حلف برداری کے بعد اراکین رجسٹر پر اپنے دستخط کر رہے ہیں۔
تقریب حلف برداری کے بعد دوسرا مرحلہ اسمبلی کے نئے اسپیکر اور ڈپٹی اسپیکر کا چناؤ ہو گا اور پھر اسپیکر اور ڈپٹی اسپیکر کے انتخاب کے بعد وزیراعظم کا انتخاب ہو گا۔
موجودہ قومی اسمبلی 336 ارکان پر مشتمل ہے جس میں سے 266 نشستوں پر ارکان براہ راست انتخابات کے ذریعے منتخب ہوتے ہیں جبکہ باقی ارکان مخصوص نشستوں پر ایوان کا حصہ بنتے ہیں
