اسلام آباد: قومی اسمبلی میں چھ جماعتی اتحاد کو دو تہائی اکثریت حاصل نہیں ہے۔
تفصیلات کے مطابق رکن جماعتوں کے نمائندوں کی جانب سے شیئر کیے گئے اعداد و شمار کے مطابق حال ہی میں بننے والے چھ جماعتی اتحاد کو آئندہ حکومت بنانے کے لیے آنے والی قومی اسمبلی میں 207 ارکان کی واضح اکثریت حاصل ہوگی۔
اس اتحاد میں پاکستان مسلم لیگ نواز (پی ایم ایل این)، پاکستان پیپلز پارٹی (پی پی پی)، متحدہ قومی موومنٹ پاکستان (ایم کیو ایم پی)، استحکام پاکستان پارٹی (آئی پی پی)، پاکستان مسلم لیگ قائد (پی ایم) اور بلوچستان عوامی پارٹی شامل ہیں۔
اس اتحاد کو قومی اسمبلی کے اسپیکر اور ڈپٹی اسپیکر کے آئینی عہدے بھی آسانی سے مل جائیں گے۔ اتحاد کی اجتماعی طاقت قومی اسمبلی میں واضح اکثریت پر مشتمل ہے، لیکن تقریباً 224 ایم این ایز کی حمایت کے ساتھ، پارلیمنٹ کے ایوان زیریں میں درکار دو تہائی اکثریت سے کم ہے۔
336 رکنی ایوان میں حکومت بنانے کے لیے 169 ووٹ جادوئی نمبر ہیں اور دو تہائی اکثریت کے لیے تقریباً 224 ووٹ درکار ہیں۔ خواتین کی 20 مخصوص نشستیں اور اقلیتوں کے لیے چار مخصوص نشستیں شامل کرنے کے بعد مسلم لیگ (ن) 108 ارکان کے ساتھ سب سے بڑی پارلیمانی جماعت بن کر ابھری ہے۔
پی ایم ایل این کے 75 ارکان قومی اسمبلی منتخب ہوئے اور 9 آزاد ارکان کے اضافے کے بعد ان کی تعداد 84 ہوگئی۔ خواتین کے لیے 20 اور اقلیتوں کے لیے چار مخصوص نشستیں مختص کرنے کے بعد ایوان میں کل تعداد 108 ہوگئی۔
پیپلز پارٹی کے منتخب اراکین کی تعداد 54 ہے اور خواتین کی 12 مخصوص اور اقلیتوں کی دو مخصوص نشستوں کے اضافے کے بعد قومی اسمبلی میں اس کے اراکین کی کل تعداد 68 ہو گئی ہے۔
پی ایم ایل این اور پی پی پی کے ایم این ایز کی کل تعداد 176 ہے جو حکومت بنانے کے لیے مطلوبہ 169 سے زیادہ ہے۔
ایم کیو ایم پی کے عام انتخابات میں 17 ارکان منتخب ہوئے اور خواتین کی چار مخصوص نشستوں اور اقلیتوں کے لیے ایک مخصوص نشستوں کے اضافے سے قومی اسمبلی میں اس کے ارکان کی کل تعداد 22 ہوگئی۔ مسلم لیگ (ق) کے تین ارکان منتخب ہوئے اور ایک آزاد شامل ہوا۔ اور خواتین کے لیے ایک مخصوص نشست کے اضافے سے قومی اسمبلی میں اس کی تعداد پانچ ہوگئی۔
آئی پی پی نے قومی اسمبلی کے تین ارکان منتخب کر لیے ہیں۔ 2024 کے عام انتخابات میں منتخب ہونے والے 99 آزاد امیدواروں میں سے 81 نے پی ٹی آئی کی حمایت یافتہ سنی اتحاد کونسل میں شمولیت اختیار کر لی ہے جب کہ آٹھ آزاد امیدواروں نے کسی جماعت میں شامل نہ ہونے کا فیصلہ کیا ہے
جمعیت علمائے اسلام فضل (جے یو آئی ایف) نے چھ ارکان منتخب کیے اور انہیں خواتین کے لیے دو مخصوص نشستیں الاٹ کی گئیں، جس سے قومی اسمبلی میں اس کی کل تعداد آٹھ ہوگئی۔
مجلس وحدت مسلمین پاکستان، بلوچستان عوامی پارٹی، بلوچستان نیشنل پارٹی (بی این پی)، نیشنل پارٹی، پختونخوا ملی عوامی پارٹی اور مسلم لیگ ضیاء کو قومی اسمبلی میں ایک ایک نشست ملی۔
