جدہ:سعودی عرب میں نوجوان طبقے میں موسیقی کی تعلیم حاصل کرنے کا شوق بڑھ رہا ہے۔ اخبار 24 کے مطابق سعودی عرب کے ’نمیر سینٹر برائے جدید فنون‘ کے بانی سلیمان السعدون نے جاری بیان میں بتایا ہے کہ ان دنوں سعودی خاندانوں میں موسیقی سیکھنے کے رجحان میں اضافہ ہوا ہے خواتین اور بچے بھی اس جانب راغب ہورہے ہیں جو موسیقی کے اسرار و رموز سے آشنا ہونا چاہتے ہیں۔ انہوں نے کہا کہ سعودی لڑکیاں بھی موسیقی کا فن سیکھنے میں غیرمعمولی دلچسپی کا اظہار کررہی ہیں۔ لڑکیاں بڑی تعداد میں موسیقی کی کلاسوں میں شریک ہوتی ہیں جو جدید آرکسٹرا کے استعمال کی تعلیم حاصل کرنا چاہتی ہیں۔السعدون نے مزید کہا کہ مملکت میں موسیقی کالجز کی کافی بڑی مارکیٹ ہے جبکہ اس کی طلب میں بھی اضافہ ہو رہا ہے۔ موسیقی کے میدان میں کام کرنے والے اداروں کو چاہئے کہ وہ اس فیلڈ میں سعودی شہریوں کو بطوراستاد ٹرینڈ کریں تاکہ وہ دوسروں کو اس کی تعلیم دے سکیں۔ تاہم اس کے لیے یہ ضروری ہے کہ اس سمت میں کام کرنے والے اداروں کی معاونت کی جائے۔
