امریکہ نے حملہ کیاتو وہ پوری طاقت سے جواب دینے میں ایک لمحہ بھی نہیں لگے گا’ ایران

تہران: ایران نے کہا ہے کہ اگر امریکا نے ہماری قومی سلامتی اور خودمختاری کو چیلنج کیا تو وہ فوری اور زبردستی جواب دے گا۔
عرب میڈیا کے مطابق ایران کی وزارت خارجہ کے ترجمان ناصر کنانی نے پریس کانفرنس کرتے ہوئے کہا کہ اس نے پہلے بھی ہر حملے کا فیصلہ کن جواب دیا ہے اور اگر امریکا نے دوبارہ حملہ کیا تو اس کا بھرپور جواب دیا جائے گا۔
ان خیالات کا اظہار انہوں نے ایک صحافی کے سوال کے جواب میں کیا جس میں ان سے پوچھا گیا تھا کہ کیا امریکا ایران پر حملے کی منصوبہ بندی کر رہا ہے؟
یاد رہے کہ اردن میں فوجی اڈے پر ڈرون حملے میں 3 امریکی فوجی ہلاک اور 40 سے زائد زخمی ہوگئے تھے، جس کا الزام امریکا نے ایران کی حمایت یافتہ حزب اللہ پر عائد کیا تھا۔
بعد ازاں امریکا نے شام اور عراق میں حزب اللہ کے ٹھکانوں پر حملہ کیا جس میں 40افراد ہلاک ہوگئے جب کہ امریکا نے ایران پر حزب اللہ کو مالی اور فوجی مدد فراہم کرنے کا الزام بھی عائد کیا۔
تاہم جب امریکی صدر سے پوچھا گیا کہ کیا وہ ایران پر حملہ کرنا چاہتے ہیں تو انہوں نے جواب دیا کہ اس کا انحصار اس بات پر ہے کہ ایران امریکی فوجیوں پر حملے میں براہ راست ملوث ہے۔
امریکی صدر کا یہ بھی کہنا تھا کہ وہ فی الوقت ایران پر حملے کے حق میں نہیں لیکن اگر ایران کے خلاف ٹھوس شواہد ہوں تو کچھ بھی ممکن ہے۔