نوازشریف کٹھ پتلی حکومت بنا کر عوام کے حقوق پر ڈاکہ ڈالنا چاہتے ہیں، بلاول

چھاچھرو: چیئرمین پاکستان پیپلز پارٹی بلاول بھٹو زرداری نے کہا ہے کہ شیروالوں نے سندھ کے معدنی پہاڑی علاقے کارونجھر کی طرف ہاتھ بڑھایا تو اسے کاٹ دیں گے۔
چھاچھرو تھر پارکر میں جلسے سے خطاب کرتے ہوئے ان کا کہنا تھا کہ باقی سیاستدان دوسروں کی طرف دیکھ رہے ہیں، میں واحد لیڈر ہوں جو عوام سے ووٹ مانگ رہا ہوں، میرے ساتھ کوئی اور نہیں، صرف عوام کھڑی ہے، حکومت ملی تو میںغریب لوگوں کے لیے 30 لاکھ گھر بناؤں گا، آپ کی آمدنی دگنی کرکے دکھاں گا۔
بلاول بھٹو نے کہا کہ پیپلز پارٹی نے تھرکول منصوبہ معاشی فوائد اور روزگار کے لیے شروع کیا تھا۔ ایک شخص چوتھی بار اپنے آپ کو مسلط کرنے کی کوشش کر رہا ہے۔ وہ شخص غلط بیانی کررہا ہے کہ تھرکول کا منصوبہ اس نے دیا’ اگر تھرکول کا منصوبہ نواز شریف کا ہوتا تو آج میں نہیں وہ یہاں جلسہ کر رہے ہوتے’8 فوری کے بعد تھرکول منصوبے پر مزیدکام کریں گے’ تھرپارکر سے کراچی تک ٹرین چلائیں گے۔
انہوں نے کہا کہ شیر والے کارونجھر کی طرف دیکھ رہے ہیں، حکومت بنائیں گے اور آپ کا گرینائٹ بیچیں گے، بے نظیر بھٹو آج بھی موجود ہیں، اگر انہوں نے کارونجھر کی طرف ہاتھ بڑھایاتو ہم ان کے ہاتھ کاٹ دیں گے۔
بلاول نے کہا کہ نواز شریف کی کوشش ہے کہ ان کے لیے کام کروایا جائے اور وہ پاکستان پر مسلط ہوں، ان کی کٹھ پتلی حکومت کراچی میں بیٹھ کر عوام کے حقوق پر ڈاکہ ڈالے، میاں صاحب کے سہولت کار سندھ میں الیکشن لڑ رہے ہیں۔