شارجہ:انٹرنیشنل لیگ ٹی ٹونٹی میں شارجہ واریئرز نے دبئی کیپٹلز کو 9 وکٹوں سے شکست دے دی، دبئی کا 105 رنز کا آسان ہدف شارجہ نے 13.1 اوورز میں حاصل کرلیا، مہیش تھیکشانا کو بہترین کارکردگی پر پلیئر آف دی میچ قرار دیا گیا۔ پیر کو شارجہ کرکٹ سٹیڈیم میں کھیلے گئے آئی ایل ٹی ٹونٹی کے 14ویں میچ میں دبئی کیپٹلز کی ٹیم پہلے بیٹنگ کرتے ہوئے 18.2اوورز میں 104 رنز پر ڈھیر ہوگئی، سکندر رضا 22 اور رولف وان ڈر مروے 21 رنز کے ساتھ نمایاں رہے۔ شارجہ واریئرز کے سپنر مہیش تھیکشانا نے 20رنز کے عوض 4 اہم وکٹیں حاصل کیں، ڈینیئل سیمز نے 3، مارک واٹ اور محمد جواد اللہ نے ایک ایک کھلاڑی کو آئوٹ کیا۔ شارجہ واریئرز نے دبئی کیپٹلز کا 105 رنز کا آسان ہدف 13.1 اوورز میں ایک وکٹ کے نقصان پر حاصل کرلیا، اوپنر نیروش ڈیکویلا 37 رنز بنا کر آئوٹ ہوئے جبکہ جونسن چارلس 43 اور جوئے ڈینلے 23 رنز کے ساتھ ناٹ آئوٹ رہے۔ دبئی کی طرف سے واحد وکٹ حیدر علی نے حاصل کی۔ اس فتح کے بعد شارجہ واریئرز کی ٹیم لیگ کے پوائنٹس ٹیبل پر دوسری پوزیشن پر آگئی ہے۔
