اسلام آباد، راولپنڈی اور لاہور سمیت کئی شہروں میں بارشوں کا سلسلہ جاری ہے۔راولپنڈی کے علاقے کہوٹہ میں کلاوڈ برسٹ سے سیلابی صورتحال پیدا ہوگئی اور پانی گھروں اوردکانوں میں داخل ہوگیا۔محلہ چاہت میں گھر کی چھت گرنے سے ایک بچہ جاں بحق ہوگیا جبکہ ماں باپ اور 2 بچوں کو ملبے سے زخمی حالت میں نکال لیا گیا۔پنڈی میں سید پور ولیج میں سب سے زیادہ 131 ملی میٹر بارش ریکارڈ کی گئی۔ محکمہ موسمیات کے مطابق پی ایم ڈی میں 81، گولڑہ میں 31 اور چکلالہ میں 25 ملی میٹر بارش ریکارڈ کی گئی۔اُدھر لاہور میں صبح سے وقفے وقفے سے بارش جاری ہے، بارش کے باعث موسم خوشگوار ہوگیا، گرمی اور حبس کا زور ٹوٹ گیا۔لاہور میں سب سے زیادہ بارش پانی والا تالاب میں 74 ملی میٹر ریکارڈ کی گئی۔ پی ڈی ایم اے کے مطابق چوبیس گھنٹوں کے دوران پنجاب میں بارش کے باعث مختلف حادثات میں 2 افراد جاں بحق اور 6 زخمی ہوئے۔دوسری جانب این ڈی ایم اے نے 10 جولائی تک ملک بھر میں شدید بارشوں اور سیلابی صورتِ حال کا الرٹ جاری کردیا۔
