وزیراعظم کا گیس کی قیمتوں میں اضافے پر برہم، اوگرا کی کارکردگی کا جائزہ لینے کا فیصلہ

اسلام آباد: وزیراعظم شہباز شریف نے گیس کی قیمتوں میں حالیہ اضافے پر برہمی کا اظہار کرتے ہوئے اوگرا اور گیس کمپنیوں کی کارکردگی کا جائزہ لینے کا فیصلہ کیا ہے۔
وزیراعظم نے وزارت توانائی کو ایک سے تین ماہ میں 16 کام مکمل کرنے کے احکامات جاری کر دیئے۔
گیس کی قیمتوں میں حالیہ اضافے کی فرانزک آڈٹ رپورٹ ایک ماہ میں پیش کرنے کی ہدایت کی گئی۔
شہباز شریف نے ایران پاکستان گیس پائپ لائن منصوبے کی نگرانی کے لیے فوری طور پر بین وزارتی کمیشن بنانے کی ہدایت کی ہے جب کہ اضافی بجلی سے استفادہ کے لیے نیا صنعتی زون بنانے کا پلان ایک ماہ میں پیش کرنے کا بھی کہا ہے۔
وزیراعظم نے پاور اینڈ پیٹرولیم ڈویژن کو دو ہفتوں میں گھومتے ہوئے قرضوں کا حل نکالنے اور گیس انفراسٹرکچر، گیس چوری اور ناقص کارکردگی سے متعلق رپورٹ دو ہفتوں میں پیش کرنے کی ہدایت کی۔