واشنگٹن: امریکی ریاست ٹیکساس میں میکسیکو کی سرحد کے قریب فوجی ہیلی کاپٹر گر کر تباہ ہوگیا جس کے نتیجے میں 3 فوجی ہلاک اور ایک زخمی ہوگیا۔ عالمی خبر رساں ادارے کے مطابق حادثے کا شکار ہونے والا امریکی فوج کا ہیلی کاپٹر میکسیکو کی سرحد پر گشت کر رہا تھا۔ ایئر بیس سے ٹیک آف کرنے کے کچھ دیر بعد ہیلی کاپٹر کا کنٹرول ٹاور سے رابطہ منقطع ہوگیا۔ بعد ازاں سرچ آپریشن کے دوران ہیلی کاپٹر کا ملبہ میکسیکو کی سرحد کے قریب سے ملا۔ ملبے سے 2 نیشنل گارڈ اور بارڈر فورس کے ایک اہلکار کی لاشیں نکال لی گئیں جبکہ ایک کو شدید زخمی حالت میں ہسپتال منتقل کر دیا گیا۔ مقامی میڈیا نے دعویٰ کیا ہے کہ ہیلی کاپٹر میں خاتون سمیت 4 اہلکار سوار تھے تاہم حادثے میں جاں بحق اور زخمی ہونے والوں کی شناخت ان کے اہل خانہ اور رشتہ داروں کی اجازت کے بعد سامنے آئے گی۔ امریکی فوج کی جانب سے جاری بیان میں کہا گیا ہے کہ ہیلی کاپٹر حادثے میں دہشت گرد حملے کے شواہد نہیں ملے تاہم واقعے کی تحقیقات کے لیے انکوائری کمیٹی تشکیل دے دی گئی۔ عینی شاہدین نے میڈیا کو بتایا کہ ہیلی کاپٹر میں ہوا میں آگ لگ گئی اور وہ زمین پر گر کر تباہ ہو گیا۔ خوش قسمتی سے جہاں ہیلی کاپٹر گرا وہاں کوئی موجود نہیں تھا۔
