بیجنگ: چینی صدر شی جن پنگ نے بیجنگ میں طالبان کی حکومت والے افغانستان کے ایلچی کی اسناد قبول کر لیں۔
غیر ملکی میڈیا کے مطابق چینی صدر شی جن پنگ نے منگل کو ایک سرکاری تقریب کے دوران افغان سفیر مولوی اسد اللہ (بلال کریمی) کی سفارتی اسناد وصول کیں
جس کے بعد چین پہلا ملک بن گیا جس نے طالبان کے سفیر کو افغانستان کا جائز نمائندہ تسلیم کیا۔
2021 میں طالبان کے اقتدار سنبھالنے کے بعد مولوی اسد اللہ بلال کریمی کسی بھی ملک میں افغانستان کے پہلے سرکاری طور پر تسلیم شدہ سفیر ہیں۔
یاد رہے کہ مولوی اسد اللہ(بلال کریمی) یہ عہدہ سنبھالنے کے لیے نومبر 2023 کے آخر میں چین پہنچے تھے، جہاں انہوں نے اپنی اسناد چین کی وزارت خارجہ کے پروٹوکول کے سربراہ ہانگ لی کے حوالے کی تھیں۔
اس ملاقات میں ہانگ لی نے افغان سفیر کا خیرمقدم کیا اور اسے چین اور افغانستان کے درمیان تعلقات کی ترقی میں ایک اہم قدم قرار دیا۔
اس سے قبل ستمبر 2023 میں طالبان نے ژاؤ شینگ کا کابل میں چین کے سفیر کے طور پر خیرمقدم کیا تھا۔
